مقابلة مع الفنان الشاب شادي فرح
حوار اجرته مجلة " Opine Digest " الالكترونية مع الفنان شادي فرح .
21 -7-2021
من هو الفنان شادي فرح؟
شادي فرح فنان لبناني صاحب الصوت الدافئ الرومانسي ابن بلدة بريح الشوفية. تأثر في سن مبكرة بأخيه الأكبر الذي كان موسيقيا مشهورا وطالبا للفنان الكبير زكي ناصيف. شغفه بالموسيقى مكنه من العزف على العديد من الآلات لم يكن قد بلغ بعد سن التاسعة حيث بدأت مسيرته الفنية بسن مبكر . تلقى تعليمه في جامعة الكسليك – ادارة الاعمال .مواهبه المتعددة بالاضافة الى صوته الجميل الرومانسي ساعدته كثيرا في مجال عمله الفني على صعيد التلحين وكتابة الاغاني .
أصدر في عام 2011 ألبومه الأول "قلبك لو دق" الذي يتضمن 13 أغنية كتبها وألفها إلى حد كبير.
حضوره المميز وطلته الراقية ساعدته في إعطاء شخصية الفنان المتكامل، حققت أغانيه نجاحات على صعيد لبنان والخارج نذكر منها على سبيل المثال وليس الحصر : كلمة منك – اه يا ليل الي قضيته - راح وما ودعته – قلبك لو داق نار الاشواق – شو بحبك، وغيرها من الأغاني.
– بداية في ظل التعبئة والتسكير العام وجائجة كورونا كيف تعاملت كفنان مع هذه الحالة؟
وقت كورونا والتسكير التزمنا متل كل ها الناس بالاحتياطات اللازمة وقعدنا ببيوتنا ،وشخصيا كنت حريص على اهلي وعلى بيي خاصة لان هيدا وباء خطير الله يبعده عن الجميع. وكان بها الفترة كتير منتشر وكنا كلنا خيفانين واكيد بفترة الحجر قضيناها على السوشيل ميديا ،وانا شخصيا قضيت ثلاث ارباع وقتي عليها .
- شو هي اكثر الصعوبات والتحديات الي واجهتها بها الفترة؟
هلاء الحمدلله بالنسبة للتحديات صحتنا بعدا منيحا التحديات كانت على كل الناس بالعالم كله الي اتاذت نحن احلا من غيرنا، والله يرحم الي ماتوا في كتير الي ماتوا بكورونا وعنا بلبنان مش بس كورونا و و مش بس الازمة الاقتصادية في كمان الضحايا الي راحت في 4 آب ( كارثة انفجار المرفأ) الله يرحمهم هيدا الي بينزعل عليه الأشياء المادية والحفلات الي راحت ما بينزعل عليها لان كلو بتتعوض الا الصحة والانسان الي راح ما بيتعوض.
- منعرف عن الفنان شادي فرح ان عملت كذا عمل فني جسدت فيه الوضع الراهن فيك تخبرنا كيف تا خطر الك الفكرة ؟
اكيد كلبنانيي كلنا اتأثرنا بالوضع ونحن كفنانيين كمان نحن مواطنين متل ها الناس كلنا سوا ، انا وسعيد مراد ال dj العالمي عملنا أغنية من وحي الأوضاع " بدي كاش" من كلماتي ومن ألحاني وسجلناها بستوديو ريمون الحاج وهو صورلها كمان الكليب واشتغل على موسيقتها Dj سعيد مراد وهي اكيد بتحكي عن واقع الحال الي عايشينوا وعن وجع اللبنانيي وبيحكي عن مدى تأثرنا بالوضع. و نحن من اول ما خلقنا عم منعاني وناطرين ها الخلاص وماكان يعرف يجي ها الخلاص ومنطلب من الله بقى يخلصنا بقى صراحة بدنا نرتاح والشعب اللبناني تعب كتير والكل متفق على الشعب.
- وأكيد كان عندك إلتزامات عقدية لحفلات خصوصا بالصيف والاعياد شو صار فيها؟؟
أكيد في التزامات وبعدنا عم منمرق حفلات بالتي هي أحسن ، قبل كورونا كان الفن احسن وكانت الأمور ماشي اكتر , واكيد هلاء السفر كتير صعب يعني بتكون ببلد ماشي حاله فجاة بصير في "LOCK DOWN" . وانا من جهتي اكيد كان عندي التزامات وكذا سفرة بس بسبب الظروف منها التغت وفي اشيا اتاجلت واشيا ناطرين نعملها متل حال كل الناس بس الحمدلله بعدنا مكملين وبعدنا مستمرين باذن الله.
- هل عندك حفلات خارج لبنان او مشارك بمهرجانات دولية؟
عندي حفلات خارج لبنان اذا الله راد لترجع تفتح البلدان وترجع الامور على طبيعتها عندي بالسعودية وعندي بمصر وعندي بقطر وانشاء الله بكون عندي بدول أوروبية.
- اذا بدنا نسأل الفنان والكاتب والملحن شادي فرح شو آخر أعماله الفنية ؟
آخر أعمالي الفنية جددت اغنية قديمة " وقفتني اوتو ستوب" وصورتها كليب ورح نزلها قريبا وهيدي الاغنية "لابو الشباب" وصورتها مع المخرج ريمون الحاج ومن توزيعه كمان، و سجلت اغنية تانية مع غابي زغيب سجلتها ووزعتها مع ستيف سلامة بستوديو "SIX & NINE" ، وانشاء الله بتشوف النور قريبا وهي كمان عملتها "Lyrics Video " مع المخرج إيلي زغيب . وفي عندي كمان أغنية رومانسية عم حضرها، وفي اغنية " كلمة منك " رجعت جددتها وعملتها " COVER" صورتها كمان مع المخرج ريمون الحاج .
- شو بيعني الك لبنان؟
انا كتير مقهور على لبنان بحبه كتير ومعلق فيه كتير وانا ابن ارض ومعلق بالطبيعة انا ابن ضيعة وكتير زعلان كتير من كل يلي عم بتصير ما عم يقدر يتحلمها المواطن اللبناني وما خصه ها الوطن اذا المسؤولين عنا زعران ما شفنا منهم حبوا للوطن. بس في كتير مواطنيين بتحب لبنان هو الحب الأول ، نحن فتحنا عيوننا على الأرض الحلوة وفتحنا عيوننا على الزعتر و فتحنا عيوننا على الياسمين وعلى نسمة الهوا الحلوة والله يحمي لبنان وانشاء الله بيرجعى يكون افضل بكتير من قبل وانشاء الله بتشرق شمس العيد من جديد .
- اذا حبيت توجه رسالة لجمهورك شو بتحب تقول؟
بوجه رسالة لكل يلي بحبوني وانشاء الله بقدم اعمال جديدة حلوة عم حضرها حاليا ،وبتعرفوا بعصر السوشيل ميديا عم منجرب نواكب العصر وانشاء الله الأغاني الجديدة تحبوها ويكون النا حظ باغاني ضاربة توصل لكل الناس.
- وكلمة أخيرة ؟
كلمة أخيرة بدي أتشكر المجلة “ OPINE DIGEST” الالكترونية وانشاء الله نكون عند حسن ظن الجميع وبدي قول الله يفرجها على لبنان ويحمي ها الشعب اللبناني الشريف ،وشكرا جزيلا.
وبدورها تمنت " Opine Digest " كل التوفيق لهذا الفنان الذي شق طريقه باسلوبه الخاص وما زال يكافح من أجل محبته لفنه وطموحه متحديا كافة الظروف والعراقيل التي لا تخف على أحد في ظل الأوضاع الصعبة التي تعاني منها البلاد.
نعرض بعض من أعمال الفنان شادي فرح
راح وما ودعته
آه يا ليل
