مقابلة مع الحكواتية والكاتبة كارولين زعرب
في مقابلة أجراتها مجلة “ OPINE DIGEST’’ الالكترونية مع الكاتبة والروائية والحكواتية كارولين زعرب طايع.
17-7-2021
من هي كارولين زعرب طايع؟
كارولين زعرب طايع كاتبة روائية وحكواتية،ولدت وترعرعت في علما الشعب في الجنوب اتأثرت وعشت تقاليد الريف وعاداته حتى انطبعت بها وتمسكت بثقافة تراثه ، تمتاز بشخصية قريبة ومتواضعة بتوصل لقلوب الناس وبتترك أثر إيجابي بالاخرين. والموهبة الي عندها بتظهر من خلال الاسلوب المميز لكتاباتها باللغة المحكية البسيطة الي بتقدر توصل للكل وبتكون رسالة هادفة إنسانية اجتماعية ثقافية تراثية .
كيف اكتشفتي ها الموهبة ؟
اول شي اسمحولي إحكي باللغة الدارجة اللبنانية او الي منسميها اللغة المحكية لغة سعيد عقل .
اول مرة اكتشفت هيدي الموهبة لما كنت بالكشافة لما طلبوا منا نكتب اغنية وسكاتش لسهرة النار بإحتفال الجمعية ، وانا من الاساس من انا وزغيرة كنت بعشق المطالعة وبالاخص القصص والحكايات الي فيها طابع تراثي .عشقت المسرح من الصغر خاصة المسرح الغنائي الرحباني ومسرح الأطفال،
عرفنا ان عندك شغف بالمسرح فيكي تعرفينا عن أعمالك؟
الي عدة نشاطات ترفيهية ومسرحيات بذكر منها : مسابقة القراءة للأطفال على خشبة الأونسكو — مهرجانات الأطفال لبلدية جبيل — مهرجانات ضهور الشوير الميلادية — مهرجانات جونية الميلادية — احتفال الميلاد في كنيسة سيدة لبنان-حريصا — احتفال الفصح في كنيسة سيدة لبنان-حريصا — أسبوع القراءة العربية للأطفال في عدّة مدارس،
ومن مسرحياتي والدمى المتحرّكة : — يلّلا نقرا — ملك الدني — قصّة وغنّية — وين العيد.
كما كتبت كلمات أغانٍ عديدة للأطفال ومنها ما صوّر فيديو كليب نذكر منها: — "بحلم بلبنان" —"أُحبّك أُمي" —"خبريات التيتا".
شو كان آخر عمل عملتيه ؟
كتاب "كركر خيطان" كان اخر عمل عملته قبل ما كورونا تدق الباب ، وهوعبارة عن قصص حقيقية صارت بيني وبين امي وبتصير مع كل بنت وامها خلينا نقول " صراع الاجيال" وهو عمل من واقع الحياة انعمل بطريقة مرنة ومبسطة ليوصل للكل.
مين أكتر الشخصيات الي أثرت فيكي؟
لما كنت زغيرة كنت مغرمة بشخصية سعيد عقل المميزة كيف يوقف وكيف كانت نبرة صوته وحركة إيديه وكيف يحكي وطريقة إداؤه وهو من الشخصيات يلي كنت حب اني التقيها بحياتي بس كنت صغيرة وما كان عندي الجرأة. و انا من حزبه بالنسبة للدفاع عن اللغة اللبنانية المحكية.
خبرينا عن شخصية "ام الكوك" ؟
هيدي الشخصية بتجسد دورامراة قروية عايشي بالجبل بتحاول بخبرياتها تخلط بين الماضي والحاضر لايصال البسمة والضحكة بطريقة هادفة.
شو بتحبي تقولي كلمة أخيرة؟
بحب إشكر "OPINE DIGEST " لتسليط الضوء على المواهب وتشجيعها ودعمها.
وبحب قول كلمة ، أن هويتنا وثقافتنا وتراثنا كنز لازم نحافظ عليهن لبنان كتير حلو بس هلاء الظروف صعبة ،إنشاء الله بتتحسن ، ونحن شعب ما منفقد الامل وما مننسا لبنان لو وين ما رحنا .
نعرض مقطع من" سكاتش" لكارولين - اليوتيوب من " يا مهاجرين إرجعوا على لبنان"
سيناريو : كارولين زعرب طايع تمثيل: جورجيو معراوي و كارولين زعرب طايع
