يا بيي بدي سافر
كارولين زعرب طايع
كاتبة روائية وحكواتية،ولدت وترعرعت في علما الشعب فعاشت تقاليد الريف وعاداته حتى انطبعت بها فَغَدت جنوبية الهوى وحافظة تراث وحملت الراية للمحافظة على العادات والتقاليد.
16-7-2021
هيهات يا بو الزلف عيني يا مولايّا
يا ابني لا تحرق قلبي بِ تركتك لِيّا
غنّا بيّي موالو
ومسح دموعو
وقلي قوم بدي آخدك مشوار
قبل ما تسكر هالشنتة وتفلّ
وطلعنا ع الضيعة وصف بيي السيارة ونزلنا ع الكرم
وقطفلي عنقود عنب وقلي
بتعرف هالعنقود أديه طيب
يا بيّي بعدو حصرم
بتعمل منو شراب الحصرم واذا نطرتو تيستوي بتاكل منو وبتطعمي عيلتك والباقي بتعملو مية شغلة
دبس العنب
مربى العنب
ذبيب
خل
نبيذ
في اطيب من ورق العريشة مع التبولة
أو ملفوف مع المحشي
يا ابني ما في أكرم من العريشة
حتى بس تشحلها بتعطيك
حطب للصاج وللموقدة
للوجاق والقاطرجي (بابور الحطب)
ولتعبك بتكافيك بسبيرتو لتشيل عرق بلدي وتشرب كاسها وكاس الارض اللي ربتنا
كأبني حتى زيزون العريش فيك تعمل منو رماد وصابون للغسيل
بيي زيزون !!!
ما تواخذني بيي كان لازم قلك عيدان العريش تتفهم عليّي
وكمّلنا ع كرم الزيتون
وصرخت بيّي قبل ما تسال
بعرف زيتون وزيت
نسيت الصابون يا ابني نسيت الصابون
ومن كرم لكرم تفاح سفرجل حامض تين
وصلنا لشجرة سنديان تحتا في مقعد.حجر
قعد بيي ولف سيجارة وصفن بالسنسلة وقلي
شوف طرابين هالزعتر بحفاف الحيط مدعوكي
في أحلى من ريحتها تفح انت وعم تجمها !
واتطلع في بحرقة ....
يا بيي بدي سافر أرض الله واسعة
وأرضك ع مين بتتركا ..
أرضك ع أد ما بتعطيا بتعطيك
بلاد برا واسعة بتبهط عليك
هون بتاكل من زرعك ومن جنا إيديك
ما خربت الدني وما خرب هالبلد غير لما تركنا الارض وركضنا ورا الفرنجي
يا إبني مش كل شي فرنجي برنجي
زهقت من هالوضع بالبلد يا بيي
زهقت من الكذب .. من النفاق
ما بقى عندي أمل
سكر دينيك وما بقى تسمع
وزراع الأمل بأرضك
عيش مع هالارض ...
ضحكلا... بتضحكلك ...
واذا الكل عمل هيك
بيرجع الوطن يضحك
ومسك معول وبلش يدق ويغني
يا ميجانا ويا ميجانا ويا ميجانا
بدك تحب الأرض تتجيب الغنى
